Act 4 | TVK | STEP | Melele xa Pita xal Sion di tamu lusepin mi moletin xil, rut pris xil mei lastal, del mereketeh xil te Nim Eo, del Satusi xil mun.

Acts 4

Pita Xal Sion Lusoh Pe Met Vat Xil te Kaonsel na Siu Xil

1 Melele xa Pita xal Sion di tamu lusepin mi moletin xil, rut pris xil mei lastal, del mereketeh xil te Nim Eo, del Satusi xil mun. 2 Iexil mikat vengan xa eloheoh xalu ak di lupispisi mi moletin xil xa likila limeul rilomun ra maten ixoni Iesu. 3 Ma xil ladal xat xalu e laling xalu e nim te xeih ba duxoh melengien sav vengan xa be mahis tuei. 4 E moletin holu xa lalong sepinien nalu, lake reitin en. Misak ni, xil xa laneket e Iesu sangas laduxoh taosen lim (5000).

5 E maxoe nen, vat xil na Siu xil, elda xil, del tisa xil te Rae xil na Mosis lamei vituei e Serusalem. 6 Xil ladotan del Anas xa be Vatixar na pris xil; e eilep sav xil xa lastal langgo vatimol nan nggoni Kaeapas, Sion, e Aleksanda. 7 Xil ladel Pita xal Sion mei lusoh pe met xil, e lasis xalu labitene, “?Neta xa mupol ni, munggur xeihen teni nggo xave? ?Mupol ni netak e his visi?”

8 Di, Ninin Eo mei polu e Pita, ma bit rilomun ni mi xil bitene, “Vat xil e elda xil na Siu xil, 9 xosali, mudel xamel tengan musis xamel ve sexien hos xa mapol ni mi moletin xa len tekali. Mubit mukil ti xa xi telonge tehos tetep. 10 Mak, ma malsep kila mi xamim, itel moletin xil ngasen tahal Isrel imak: nggo xeihen te his Iesu Kristo tahal Nasaret, moletin ak len bos e mea misoh pe met xamim. Iesu ak iaxa xamim muteti xati e eivave teha temat, e Hi tepol ni temea rilomun ra maten. 11 Iesu be ngan xa Vanuvei na Hi di tesep usili tehit,

'Hat tei xa lapol ni nim ni,
xa moletin xil te polien labit misa e laso ni ba,
xi vari bemei bos mak mu mili hat tesav xil.' ^{▼▼4:11 Sam 118:22}

12 Iesu kestang mikila iteh meulien e xir. E ut etan ak, his moletin sav tovuol mun xa Hi misa ni tengan mei vateh meulien e xir.”

13 Melele xa vat xil te Kaonsel lalong Pita xal Sion lusepin bos mak, latemanin ni xalu. Tave ti neta xa lutasukul kuhi ti, ulixalu takan ti. E xil lapus kila mun xa xalu di lutehusil Iesu. 14 E lasakras lasep sisil xalu, vengan lapusi xa moletin xa len mei bos di tamu misoh del xalu. 15 Ma xil lasil rat xatel latbe hale vuteili. Melele xa latoba, xil di lasep tetavoe ve rin xa be natel mi xil mun tang 16 labit, “?Ripol ni itep mi xalu? Moletin xil vus e Serusalem lakila xa xalu ak lupol ni merekel tei xa eilep pupu. Rasakras raviteni ravit tave reitin ti. 17 Xosxa rabit moletin xil linalongeong ni ti usil merekel ak, ma rike xat xalu tengan lalnasepin ti mun mi moletin xil usil Iesu.”

18 Di, lakes rilomun ni xalu lumei nim, e lake xat xalu nggeih tengan lalnasepin ti e lalnapispisi ti mun mi moletin xil usil Iesu. 19 E Pita xal Sion lubit rilomun ni mi xil lubitene, “Xamim muhit naha xa momal pe met Hi. ?Xamel maliteong xat xamim, mu Hi? !Muhiteni! 20 Vengan xa xamem masakras mavit manasepin ti ve neta xa mapusi e malonge.” 21 Ma vat xil te Kaonsel lake xat xalu nggeih rilomun e lamae ni xalu be vexalu mase. Xil lasakras lasa pangasien mi xalu vengan xa moletin xil vus di lapet rat his Hi ve naha xa testal. 22 Moletin xil lakila xa naha xa testal be merekel vengan moletin xa len tekali e temei tehos rilomun, huram nan mitavi e hanutap lu (40).

Moletin Xil xa Laneket e Iesu Lasis Hi Tengan Valeh Rat Ulikanen Vahe Reling Xil

23 Melele xa vat xil te Kaonsel lamae ni Pita xal Sion ba vexalu mase, ludilomun ba lupus timue nalu xil xa laneket e Iesu. E melele xa lupus xil, lubit mese ni mi xil sepinien xil xa vat xil na pris xil, del elda xil latehiteni mi xalu. 24 E melele xa lalonge, xil vus lasis vituei ba mi Hi labitene, “Hi Suv, xouk xa opol ni ut nesao, ut etan, tas, e holesok xil vus xa ladi en; 25 nggo xeihen te Ninin Eo, xouk otesepin texo avu namem Deved xa tehe moletin te polien nam xa otehit,

'?Veneh ma ngan xil xa latave Siu ti di iexil mikat?
?Veneh ma moletin xil di lapol ni lingxatien xil xa mei be neta sav tang?
26 Suv toto xil te ut etan di labue xat xil ve vaeen,
e vat xil lamei vituei tengan livae mi Hi Suv e mi Kristo nan xa xi tehosei.' ^{▼▼4:26 Sam 2:1,2}

27 Reitin mak, Suv Toto Herot e Pontias Paelet mei lutevituei e Serusalem tetel ngan xil xa latave Siu ti e Siu xil tengan lavae mi Iesu, xa be moletin te polien nam xa be eo. 28 Naha xa lapol ni mi Iesu tehusil naha xa xouk oteling xati tuei texo xeihen nam otehit mei istal. 29 Hi Suv, taxeak, ulong kil sepinien xil nae xa labiteni ba xat xamem, moletin te polien nam xil. Uhur rat ulikanen ihe reling xamem tengan mukila musa sepinien nam itel xeihen. 30 Usa xeihen nam mi xamem li tengan mukila mutal rerat moletin xil ra meseien nae, e mupol ni merekel e holesok sav xil xa tellep ixo his Iesu xa be moletin te polien nam xa be eo.”

31 Melele xa lasis bus, nim xa ladi en mulul. E xil vus lapolu ni Ninin Eo, e ba di lasetu ni sepinien na Hi del xeihen, e uli takan ti.

Sexien Hos na Moletin Xil xa Laneket e Iesu

32 Vanut moletin xil xa laneket e Iesu ladi vituei bos e nenemien nae be tei takes. Tovuol e xil vahe hokan ni neta ngan, xil vus lamae ni holesok nae xil tengan itutou ni mosav ni. 33 Del xeihen na Ninin Eo, eloheoh xil di labit usil mea rilomunen na Iesu. E Hi di duxol xat xil ni holesok xil ngasen. 34 Xil latave tamure ni ti neta, vengan xa vateinga, ngan xil xa tan nae e nim mae di, lapos ni. Di, langgur vatu nen 35 e lasa ni ba ni eloheoh xil. Di, laseti vatu xil ak ba dutou ni ngan xil xa nae tovuol.

36 Mak, ma moletin tei teta, hisen Siosep tahal Saepras. Xi nggo vatimol na Livae. Ve sexien hos nan, eloheoh xil laling xoles hisen be 'Banabas' xa koute teni be 'moletin xa di pet rat nenemien na mosav xil.' 37 E melele nen tak, xi pos ni tan tei nan e misa vatu nen ba ni eloheoh xil.